好不幸地，之前個活肝移植失敗左，好彩既係剛剛有屍肝捐出黎，而家正係到做緊移植手術。
小弟當然唔知手術詳情，更加唔知道所謂「移植失敗」既原因，但係我見到唔同文章既留言，實在錯得離譜，希望我可以借住呢一個小小既平台，回應一下呢一D誤解。
[1] 「點解唔一開始就用屍肝？白白浪費左人地個肝！」
答：當時係並未有屍肝捐出，所以先會出現修例比17歲女兒捐肝既討論、所以先會最後要係社會上搵熱心人事捐肝。香港既器官捐贈率一向偏低，就以肝為例，而家有近百人排緊隊，而係2016年全年只有73個肝臟成功捐出（37活肝、36屍肝）。每一年亦都有二三十個病人因為等唔到肝要病逝。最嚴重既係腎，而家有二千幾人排緊隊，但係2016年只有80個腎臟成功捐出。
的而且確，之前個活肝失敗左係可惜，但絕對唔係白白浪費。據報道，當時鄧女士嘅情況根本等唔到今時今日。而且成件事令到器官捐贈終於得到大家嘅關注，事件絕對無「白白浪費」到。
[2] 「人地咁就無左三分之二個肝，成世殘廢喎！」
答：肝臟有個非常神奇既功能，係識得自我復原。切左半個肝的話，大概幾個月之內就會生返完整一個出黎。呢個功能係其他器官無嘅。
[3] 「班廢柴醫生，唔掂就咪搞啦！」
答：原著留言當然比節錄更激動，好多都係針對盧寵茂教授。無論大家政見唔相同，小弟希望大家都是其是、非其非。
香港大學以及瑪麗醫院嘅肝臟移植係世界知名。前外科學系系主任范上達係1991年完成香港第一宗肝臟移植，1996年成功做到世界上第一宗活體右肝移植。當時全世界對活體肝根本都未敢做，較大嘅右肝更加係唔敢郁，而且移植手術當時係一個風險極大嘅手術，存活率極低。當時就係范上達教授同盧寵茂教授嘅團隊堅持創新，活體肝、右肝移植都成為選擇之一。而家一年存活率亦係90%以上，係世界上係名列前茅。
=========================
小弟只係小小一名醫科生，但我希望大家對呢件事嘅理解深些少，要批評都要係基於事實去做。如果小弟寫嘅有錯，還望大家指正。
Related Post:
https://www.facebook.com/mingpaoinews/posts/1397200260340105
Search